Posted on: December 17th, 2023
12.12.2023.
Halmashauri ya Wilaya ya Kibiti imeanza mkakati mpya wa kupandisha ufaulu kwa kuhakikisha wanafunzi wanakuwa na msingi mzuri wa lugha ya kiingereza ambayo imeonekana kuwa changamoto kwa wanafunzi katika kujifunza.
Lugha ya kiingereza ilikuwa inaanza kufundishwa darasa la tatu, sasa itaanza kufundishwa kuanzia darasa la kwanza hatua itakayosaidia watoto kuweza kujieleza na kuwa na msingi mzuri wa lugha hiyo.
Mafunzo hayo yamefanyika katika shule ya Msingi Kitundu Wilayani humo na kufunguliwa rasmi na Mkuu wa Wilaya ya Kibiti Kanali Joseph Kolombo.
Halikadhalika mafunzo hayo hayamewezeshwa na Sofia Amas pamoja na Albert Kitali wakufunzi kutoka Taasisi ya Elimu Tanzania (TET) ambayo inajihusisha na ukuzaji wa mitaala nchini.
Wakufunzi hao kwa nyakati tofauti walisema lengo la mafunzo ni kuwezesha walimu kufundisha somo la kiingereza kwa ufasaha, ambapo pia mafunzo yatawasaidia kufundisha stadi za kusikiliza, kusoma na kuandika.
"Tuko hapa kuendesha mafunzo ya siku mbili ya somo la kiingereza kwa walimu wanaofundisha darasa la kwanza na la tatu ambapo tumejikita kwenye KKK kwasababu, zitasaidia mtoto kuwa na msingi mzuri atakapoingia darasa la tatu, kama vile kutambua sauti, kuumba maneno n.k” walisema Wakufunzi hao
"Tunaamini baada ya mafunzo haya, walimu wataleta mabadiliko chanya katika ufundishaji na ujifunzaji wa somo la kiingereza kwani ni tegemeo letu kuwa, wanafunzi watapata maarifa na ujuzi wa kuongea kiingereza na kuongeza ufaulu" walisema wakufunzi.
Aidha, Afisa Elimu wa Wilaya ya Kibiti Mwl. Zakayo Mlenduka alisema mafunzo hayo yamefika muda muafaka kwa sababu sera mpya inaelekeza somo la kiingereza kuanza kufundishwa kuanzia darasa la kwanza mpaka la sita tofauti na ilivyokuwa awali kuanza kufundishwa darasa la tatu.
"Tunamshukuru Mkurugenzi Mtendaji Bw.Hemed Magaro kwa kuwezesha mafunzo haya, ambapo fungu limetoka kwenye mapato ya ndani ya Halmashauri ya Wilaya ya Kibiti ili walimu waweze kupatiwa mafunzo hayo" Alisema Mlenduka.
Akifungua mafunzo hayo Kanali Kolombo kipekee amemshukuru Mkurugenzi Mtendaji Bw. Hemed Magaro na wasaidizi wake kwa kuliona hilo na kulipa kipaumbele, kwani lugha ya kingereza ndiyo lugha kuu ya mawasiliano katika ulimwengu tunaoishi wa Sayansi na Teknolojia.
"Ninamshukuru Mkurugenzi kwa kuliona hili na kutenga fedha kwa ajili ya kuwaandaa walimu hawa kupatiwa mafunzo ya Mtaala mpya wa ufundishaji" Alisema Kolombo.
Hata hivyo aliwataka walimu walioshiriki mafunzo hayo kuitumia fursa hiyo adhimu waliyoipata kuelewa vizuri ili wakaweze kumudu kufundisha somo la kiingereza na kuinua ufaulu ndani ya Wilaya.
"Ni matarajio yangu baada ya mafunzo haya mnakwenda kuwa na mbinu na mikakati mipya ya kuhakikisha watoto wanaweza kumudu somo la kiingereza "Alisema Kolombo.
"Ninajua walimu mnachangamoto nyingi sana, lakini isiwe kikwazo cha kutotimiza wajibu wenu, endeleeni kuchapa kazi Serikali ipo makini nanyi".
