MOHAMEDI I. MAVURA NA BAADHI YA MAAFISA KUTEMBELEA VYUMBA 21 VYA MADARASA WILAYANI KIBITI

Posted on: October 19th, 2022

Ikiwa ni Mwendelezo wa ziara za ukaguzi wa miradi ya Maendeleo Mkurugenzi Mtendaji wa Halmashauri ya Wilaya ya Kibiti Ndg. Mohamed I. Mavura akiambatana na maafisa mbalimbali wa serikali wilayani humo wametembelea miradi ya shule za sekondari yenye thamani ya Sh. 420,000,000/= fedha kutoka Serikali Kuu. Fedha hizi  zinajenga jumla vyumba 21 vya madarasa katika Kata za Dimani, Mtawanya Bungu na Mwambao.

Akiwa katika shule ya Sekondari Dimani Mavura akakagua eneo ambalo darasa moja litajengwa na kiasi cha shilingi 20,000,000 kimetengwa kwa ajili ya ujenzi huo. Mpaka leo tarehe 19/10/2022 mafundi wamekwisha patikana na zoezi la kuchimba msingi linaanza.

Akiwa katika shule ya sekondari ya Mtawanya ambapo kiasi cha sh. 180,000,000/= kimetengwa kwa ajili ya ujenzi wa vyumba 9 vya madarasa na ofisi ya walimu, Mkurugenzi amezindua zoezi la  ujenzi wa msingi kwa kushiriki katika uchanganyaji saruji na kokoto ili kuamsha hari ya mafundi.

Katika Shule ya Sekondari Nyambili Nyambunda ambapo ujenzi wa vyumba 5 vya madarasa  wenye thamani ya  sh.100,000,000, Mkurugenzi na Maafisa alioambatana nao wamefurahishwa sana na jitihada za wananchi jinsi walivyo jitokeza kwa wingi kujitolea nguvu zao ii kuhakikisha kwamba ujenzi unakamilika kwa haraka. Hali hii inaonyesha kwamba wananchi wanashauku kubwa kuona Watoto wao wanapata elimu katika eneo la karibu na makazi yao.

Ziara ikahitimishwa katika shule ya Sekondari Mwambao ambapo vyumba 6 vya madarasa vyenye thamani ya sh. 120,000,000. Viongozi wakaridhishwa na hatua za awali kwa zoezi la kuchimba msingi wa boma unaoendelea shuleni hapo.

Katika ziara hiyo kwa nyakati tofauti Mavura ametoa maagizo yafuatayo:

• Kamati za ujenzi kuwa na mipango ya muda mrefu ya matumizi mazuri ya ardhi kwa kupangilia majengo ili yaweze kukidhi mahitaji ya baadae.
• Walimu kuhakikisha wanapanda miti yenye faida kiuchumi katika shule hizo ambayo pia itaweka mwonekano mzuri  wa mazingira ya shule.
• Ununuzi wa vifaa vya ujenzi kufuata utaratibu wa Serikali  kupitia mfumo na kuzisihi kamati za miradi kuisikiliza Idara ya manunuzi na Idara.
• Katika shule ya Sekondari ya Nyambili Nyambunda  na Sekondari ya Mwambao wananchi wahakikishe wanachonga barabara za kudumu zinazoelekeza namna ya  kuingia kufika shuleni.
• Uchimbaji na ujenzi  vyoo kuanza mapema sambamba na ujenzi wa madarasa.